Vinnige feite
- Atleetvoet kom meestal tussen die tone voor. Hierdie area is gewoonlik jeukerig, en die vel lyk rooi. As gevolg van die bakteriële infeksie kan dit ook seer wees.
- Jy kan die swam van jou af weghou deur higiëniese gewoontes toe te pas en vir jou ma te luister as sy op ʼn Vrydagaand vir jou vra om te gaan bad.
- Hou jou naels kort, en was jou hande gereeld. Stort met plakkies as jy by ʼn vakansieoord is, en was die bad behoorlik uit, indien daar ʼn bad is. Indien jy die gogga tussen jou tone gewaar, is dit wys om eerder ʼn dokter te raadpleeg vir advies oor die korrekte behandeling.
Atleetvoet is ʼn velinfeksie wat deur ʼn swam veroorsaak word. Dit kan herken word deur blase wat op die voet verskyn. Dit kan op enige deel van die voet voorkom, maar oor die algemeen groei die swam tussen die tone en onder die voet. Dieselfde swam kan ook op die hande en onder die naels groei. 1
Atleetvoet word deur ʼn aantal verskillende swamme veroorsaak. Die swam word gewoonlik verkry deur kontak met besmette vel, of kontak met ‘n swam in die omgewing. Swamme kom algemeen naby swembaddens en in badkamers voor, en dit kan ook deur diere versprei word. Daarom is dit wys om eerder met plakkies te stort as jy by ʼn vreemde stort is, veral tydens ʼn vakansie, waar baie mense een stort gebruik. 2
Hoe om dit uit te ken
Soos reeds genoem, kom atleetvoet meestal tussen die tone voor. Hierdie area is gewoonlik jeukerig, en die vel lyk rooi. As gevolg van die bakteriële infeksie kan dit ook seer wees, die vel kan bars en daar kan ook ʼn vreemde reuk teenwoordig wees. In ander gevalle gaan die jeuk weer gepaard met blase op die voetsool. 3
Verspreiding
Indien die swam nie onder beheer gebring kan word nie, kan die vel later bars. Die vel kan byvoorbeeld oopgaan omdat die vel só jeuk en die persoon aanhoudend krap. Sodra die vel oop is, is die vel aan bakteriële infeksie blootgestel. Hoe meer jy krap, hoe langer neem dit om te genees. Hierdie swam kan dan verder versprei na die toonnaels, en dit kan voortleef op die keratien wat in naels gevind word. Hou dus jou naels kort, en was jou voete behoorlik. 4
Voorkoming en behandeling
Jy kan die swam van jou af weghou deur higiëniese gewoontes toe te pas en vir jou ma te luister as sy vir jou vra om te gaan bad. 5 Hou jou naels kort, en was jou hande gereeld. Stort met plakkies as jy by ʼn vakansieoord is, en was die bad behoorlik uit, indien daar ʼn bad is. Indien jy dié gogga tussen jou tone gewaar, is dit wys om eerder ʼn dokter te raadpleeg vir advies oor die korrekte behandeling. 6
Woordbank
| higiëniese | Die gewoonte om jouself en jou omgewing skoon te hou om siektes te voorkom. |
| infeksie | Binnedringing van siektekieme of organismes soos bakterieë/skimmels/wurms/ens. wat siektes kan veroorsaak; ontsteking; besmetting. |
| keratien | Horingagtige proteïenstof waaruit skubbe/naels/vere/hare/horings/ens. ten dele bestaan. |
| swam | Enige van ‘n groep organismes wat wissel van ‘n enkele sel tot ‘n massa vertakte filamente wat dikwels tot gespesialiseerde vrugliggame groei, wat deur spore voortplant, op verrotte materiaal leef of op ander organismes teer; muf; skimmel; gis. |
Lees hierdie om nog meer te leer
- Persoonlike higiëne
- Die simptome en oorsake van atleetvoet
- Wat is atleetvoet en hoe behandel ‘n mens dit?
Kyk hierdie video’s om meer te leer
Slaan atleetvoet vir ‘n ses
Nog raad met atleetvoet
Wat is atleetvoet en wat veroorsaak dit?
