Vinnige feite

  • Die Son kom vir Venus in die weste op en sak in die ooste. (Teenoorgestelde as op die Aarde.)
  • Op Venus kom die Son nie elke dag op en gaan onder soos ons dit op die Aarde ken nie. Een dag-nag-siklus neem 117 aardse dae, omdat Venus se rotasie in die teenoorgestelde rigting as sy wentelbaan om die son plaasvind – dink net hoe lank sou mens daar moes slaap!
  • Winde op Venus waai teen orkaanspoed wat meebring dat groot wolke die planeet elke vyf dae geheel en al bedek.
  • Lewe soos ons dit op die Aarde ken is, as gevolg van die ekstreme temperature en suur gasse, nie op Venus moontlik nie.
  • Die planeet is vernoem na ’n Romeinse godin van liefde en skoonheid. Venus is bekend vir sy opvallende helder wit lig en vandaar die naam wat aan skoonheid gekoppel is.
  • Venus het geen mane nie.
Foto: iStock

Venus is ’n bekende planeet en is een van agt planete wat rondom die son wentel en deel van die sonnestelsel vorm. Die planete in die sonnestelsel beweeg in ’n ellipsvormige baan om die son. Die planete hou nooit op beweeg nie en word deur swaartekrag (gravitasie) in hul bane gehou. 1 2

Venus is die tweede planeet naaste aan die son. 3

Swaartekrag tussen die planete en die Son

Die son is die grootste en swaarste hemelligaam in die sonnestelsel, daarom oefen dit ook die grootste hoeveelheid swaartekrag op die planete uit. Die swaartekrag veroorsaak dat al die planete in bane om die son beweeg, dus ook Venus. 3

Die name van die bekendste planete

Naby tot ver van die son Groot na klein
Mercurius Jupiter
Venus Saturnus
Aarde Uranus
Mars Neptunus
Jupiter Aarde
Saturnus Venus
Uranus Mars
Neptunus Mercurius

Nota: Afgesien van hierdie planete is daar nog vyf dwergplanete. 4

Die binneplanete van die sonnestelsel

Die agt planete wat deel vorm van die sonnestelsel word verdeel in binneplanete en buiteplanete. Die vier planete naaste aan die son word die binneplanete van die sonnestelsel genoem.

Hulle bestaan almal uit rots en sommige van hulle het ‘n dun laag gas om die buitekant. Die aarde het ‘n baie dun laag van water en grond ook. Die planete wentel elk in sy eie baan om die son. 3

Meer oor Venus

Venus is die tweede naaste planeet aan die son en ook die aarde se naaste buurplaneet. Dit is amper dieselfde grootte as die aarde, lyk wit en skyn baie helder in die aand of vroegoggend. Venus staan ook bekend as die oggend- en aandster.

Venus is een van die planete wat baie mooi lyk vanaf die aarde, maar die eintlike rede vir sy helder lig is omdat dit bedek is met ’n dik wolkmantel van swawelsuur. Die digte atmosfeer bestaan hoofsaaklik uit koolstofdioksied. Dit vang so baie hitte vas dat die lawabedekte oppervlak van die planeet ’n skroeiende 464 °C bereik 5, wat Venus die warmste planeet in die sonnestelsel maak. Dit is warm genoeg om lood te smelt!

Anderkant die digte wolk van koolstofdioksied is al vulkane en misvormde berge waargeneem. Die oppervlak bestaan uit ’n dun kors rots wat beweeg en bult soos Venus se mantel skuif en vulkane vorm. Venus verskil ook van die aarde en die meeste ander planete in dié opsig dat dit in die teenoorgestelde rigting as die aarde en ander planete roteer. 6

Venus se vreemde rotasie en wentelbaan

Venus is een van twee planete wat andersom roteer as die res van die planete. Venus en Uranus roteer vanaf die ooste na die weste.  Die planeet roteer baie stadig – een dag op Venus neem 243 aardse dae! Dit maak Venus amptelik die planeet met die langste dag in die hele sonnestelsel.

Venus neem 225 aardse dae om een wentelbaan om die son te voltooi. Venus se wentelbaan is ook die mees sirkelvormigste van al die planete, amper ’n perfekte sirkel. Die ander planete se wentelbane is ellipsvormig.

Venus draai om sy eie as in ’n amperse regop posisie, met ’n hoek van 3° en ondervind daarom nie sigbare seisoene nie.

Navorsing oor venus

Meer as 40 ruimtetuie is al op sendings gestuur om Venus of sy wentelbaan te verken. Venus is die eerste planeet wat al ooit deur ’n ruimtetuig afgeneem is, deurdat die tuig verby die planeet kon beweeg om foto’s en inligting bymekaar te maak.

Die National Aeronautics and Space Administration (NASA) het die Mariner 2-ruimtetuig op 14 Desember 1962 afgevuur en die sending was suksesvol. Daarna het die ruimtetuie Mariner 5, Mariner 10, Pioneer Venus 1, Pioneer Venus 2 en Magellan Venus ook verken.

Die voormalige Sowjetunie is die enigste nasie wat, tot op hede, ’n ruimtetuig op Venus se oppervlak kon laat land. Weens die ongunstige toestande en geweldige hitte op die planeet, het dié ruimtetuig egter nie lank gehou nie. 6

Nog feite oor Venus

Deursnee 12 104 km
Gemiddelde afstand van die Son 108,2 miljoen km
Getal mane 0
Daglengte 5832 uur
Getal dae wat dit neem om om die Son te beweeg 255 Aarde-dae

Woordbank

sonnestelsel Die sonnestelsel bestaan uit die Son saam met al die planete wat rondom die Son wentel. Dit sluit ook asteroïde, meteore, komete en die planete se mane in. 3 Die sonnestelsel is dus die Son en alles wat dit omring. 1
gravitasie Dit is die krag waarmee twee voorwerpe mekaar aantrek. 3
wentel Om beweeg of draai. 5

Lees hierdie artikels om nog meer te leer

Kyk na hierdie video’s om nog meer te leer

Die planeet Venus

Interessante feite oor Venus

Foto: iStockFoto: iStockFoto: iStockFoto: iStockFoto: iStock
Gepubliseer op: 16 Februarie 2022 | Bygewerk op 16 April 2024